P162.7 milyong supplemental budget ng Bulacan vs COVID, pasado na
MANILA, Philippines — Pinagtibay na ng Sangguniang Panlalawigan ng Bulacan ang may P162.7 milyong supplemental budget bilang karagdagang pantustos sa mga pangangailangan ngayong nilalabanan ang coronavirus disease 2019 (COVID-19) sa lalawigan.
Ayon kay Bise Gobernador Wilhelmino Sy-Alvarado, nagmula ang pera sa Bayanihan Grant to Provinces ng Department of Budget and Management.
Layunin nito na agapayan ang mga pamahalaang lokal para sa mga gastusin ngayong may pandemya.
Base sa inihaing talaan ni Gob. Daniel Fernando ng mga gagastusan, pinakamalaking bahagi sa naturang budget ay ilalaan sa maintenance at iba pang operating expenses kung saan nakapaloob dito ang P89.3 milyon sa medical supplies, P29.5 milyong piso para sa drugs and medicines supplies at 5.7 milyong pisong pagkukumpuni ng mga pasilidad na kakailanganin bilang isolation facilities.
Kabilang naman sa capital outlay ang P16.3 milyon para sa karagdagang hospital equipment partikular na para sa operasyon ng Bulacan Infection Control Center habang may P11.5 milyon para sa pagtatayo ng isang Bio-Molecular Laboratory.
- Latest