SWS: 4.2 milyon pamilyang Pilipino nakararanas ng gutom sa COVID-19 crisis
MANILA, Philippines — Lumabas sa pag-aaral ng Social Weather Stations (SWS) kamakalawa na umakyat na sa 4.2 milyong pamilyang Pinoy ang nakararanas ng gutom sa nakalipas na tatlong buwan sa gitna ng coronavirus (COVID-19) pandemic.
Sa COVID-19 Mobile Phone Survey na isinagawa mula May 4-10, lumalabas na dumoble sa 16.7 porsyento ngayong May 2020 ang mga pamilyang nagugutom kumpara sa 8.8 porsyento noong Disyembre 2019.
Napag-alaman din sa survey na 99 porsyento ng pamilyang Pilipino ang nakatanggap na ng food aid buhat pa noong sumiklab ang COVID-19 sa Pilipinas.
Batay ito sa pinasagutang tanong na “Nitong nakaraang tatlong buwan, nangyari po ba kahit minsan na ang inyong pamilya ay nakaranas ng gutom at wala kayong makain?” sa isang panayam gamit ang mobile phone sa 15-anyos pataas kung saan 294 ang mula sa Metro Manila; 1,645 sa Luzon; 792 sa Visayas; at 1,279 naman sa Mindanao.
Sa ulat, 3.5 milyon ang nakararanas ng “moderate hunger” habang nasa 699,000 naman ang nakararanas ng “severe hunger”.
Kung titingnan ang depinisyon ng SWS, ang moderate hunger ay nakararanas ng isang beses hanggang pailan-ilang gutom habang ang severe hunger naman ay madalas nakararanas ng gutom.
- Latest