Tuloy pa rin ang kaso kay Sinas-IAS Chief
Kahit ipinagtanggol ni Duterte...
MANILA, Philippines — Magpapatuloy ang reklamong kriminal na isinampa kay NCRPO chief, Police Major General Debold Sinas sa gitna ng pagtatanggol sa kanya ni Pangulong Rodrigo Duterte.
Ito ang sinabi kahapon ni Internal Affairs Service Inspector General Attorney Alfegar Triambulo at naniniwala ito na walang implikasyon sa reklamong kriminal at administratibo na isinampa sa opisyal ang komento ng Pangulo.
Aniya, hindi naman iniutos ng Pangulo ang pagsampa ng kaso kay Sinas.
“Wala naman… ‘Yung sa criminal, tutuloy naman ‘yun eh, ewan ko sa piskal kung ano ang nangyari, malaman din natin sa piskal… Kasi sabi niya, kung the law is the law eh ‘di tuloy ‘yung mga kaso pero siguro for the meantime… puwede ka namang manatili riyan hanggang walang conviction,” ani Triambulo.
“Wala naman siyang sinabing hindi kakasuhan, sinabi lang naman niya na nandiyan lang… maganda rin naman performance, medyo istrikto si Sinas kaya hayaan mo lang penalty sa kanya, i-impose. Kaya sabi niya ‘the law is the law,’” dagdag pa nito.
“Gumugulong pa ‘yung mga kaso kasi may mga presumption of innocence ‘yan kaya siguro ganyan,” ani Triambulo.
Sinabi rin ni Triambulo na maaaring hindi pa nakita ng Pangulo ang investigation report na ipinadala ng IAS sa opisina ni Executive Secretary Salvador Medialdea noong nakaraang Lunes.
Ipinagtanggol ng Chief Executive si Sinas kasunod ng kontrobersyal na mañanita nito noong Mayo 8.
Giit ni Pangulong Duterte, mabuti at tapat na pulis si Sinas at sinabing hindi nito kasalanan kung sinorpresa siya ng mga kasamahan noong kanyang kaarawan. Aniya pa, mananatiling NCRPO chief si Sinas.
- Latest
