Gunrunner dedo sa shootout
MANILA, Philippines — Namatay noon din ang isang gunrunner na drug pusher matapos umanong makipagbarilan sa mga pulis na humahabol sa kanya nang makatakas sa buy-bust operation sa Zone 6, Sitio Benodegahan, Brgy. Cabanbanan, Balatan, Camarines Sur, kamakalawa.
Ang suspek na namatay noon din dahil sa mga tama ng bala sa iba’t ibang bahagi ng katawan ay nakilalang si Muhammad Samid alyas “Badjao”, nasa hustong gulang ng Brgy. San Jose, Iriga City.
Nabawi mula sa suspek ang isang high powered shotgun, kalibre 38 revolver at ilang sachet ng shabu habang nakatakas naman ang hindi nakilalang kasama na nagmamaneho ng motorsiklo.
Sa ulat, alas-11:20 ng umaga ay kumagat si Samid sa inilatag na buy-bust operation ng Balatan Police makaraang alukin nito ng ibenebentang baril ang posuer buyer.
Gayunman, habang ginagawa ang transaksyon ay nakahalata si Samid na pulis ang kanyang ka-deal kaya’t bigla itong sumakay sa motorsiklo na minamaneho ng isang kasama.
Subalit, pinagbabaril ng suspek ang mga humahabol na pulis kaya napilitang gumanti ang mga pulis at tinamaan ang suspek at nahulog habang minamaneho ng kasama na nakatakas.
- Latest