Jeepney drivers sa Maynila binigyan ng tig-isang kaban ng bigas
MANILA, Philippines — Dahil sa patuloy na hindi nakakabiyahe dulot ng quarantine ay binigyan ang nasa 1,777 drivers at operators na miyembro ng dalawang transport groups ng tig-isang kaban ng bigas.
Inihatid ng mga tauhan ng Manila Traffic and Parking Bureau (MTPB) sa kani-kanilang bahay ang isang kaban o 50 kilo ng bigas sa mga miyembro ng Pasang-Masda at Federation fo Jeepney Operators and Drivers Association of the Philippines (FEJODAP).
Samantala, matapos na makarating sa tanggapan ni Manila Mayor Isko Moreno ang mga sumbong ng mga senior citizen na hindi nabigyan ng kanilang mga barangay officials ay nagpahabol ito ng ayudang gatas at tig-P1,500 cash.
Matatandaan na naglabas ng P13.3 milyong alokasyon ang Manila City Council para mabigyan ng tulong-pinansyal ang mga senior citizen habang isang kompanya rin ang nagbigay ng donasyon na gatas ngunit nasa 8,931 seniors ang nagreklamo na hindi sila naabutan ng ayuda.
Sinabi ni Moreno na iimbestigahan at papanagutin ang mga barangay officials na nagpabaya kung bakit hindi nakasama ang malaking bilang ng senior citizens.
- Latest
