P4.2 milyon marijuana samsam sa Sulu
MANILA, Philippines — Nasamsam ng pinagsanib na elemento ng Philippine Marines at Philippine Drug Enforcement Agency (PDEA) Sulu ang nasa P4.2 milyong halaga ng marijuana sa isinagawang marijuana eradication operation sa limang malalawak na plantasyon nito sa Kalingalang Caluang, Sulu kamakalawa.
Sa report ni Rear Admiral Erick Kagaoan, commander ng Naval Forces Western Mindanao, dakong alas-4 ng madaling araw nang magsagawa ng marijuana eradication operation ang mga awtoridad sa plantasyon ng marijuana sa Sigio Mangal Mangal, Brgy. Masjid Punjungan ng nasabing bayan. Gayunman, nabigo ang mga operatiba na masakote ang target na mga cultivators ng marijuana.
Nadiskubre sa lugar ang limang malalawak na plantasyon na may ilang metro lamang ang layo sa bawat isa at nasamsam dito ang may 21,000 na puno ng marijuana, mga binhi at punla na aabot sa P4.2 milyon ang kabuuang halaga.
Matapos ang imbentaryo at dokumentasyon, agad sinunog sa lugar ang mga nakumpiskang marijuana.
“The Fleet-Marine Team in Sulu will continuously work with other government agencies to identify and arrest the owner of the said plantation in order to put to a stop the cultivation of marijuana in the province,” ani Kagaoan.
- Latest
