Matitigas ang ulo sa Cavite ipapadisiplina sa mga sundalo
MANILA, Philippines — Hiningi na ni Cavite Gov. Jonvic Remulla ang tulong ng Armed Forces of the Philippines (AFP) para magpatupad ng enhanced community quarantine (ECQ) sa lalawigan dahil sa marami pa ring sumusuway sa ECQ.
“Nakakakulo ng dugo na 90% ay nasunod sa patakaran ngunit may 10% na matigas ang ulo at baka sanhi ng lalong pagkalat ng COVID-19. Nakakapikon!” pahayag ni Remulla.
Dahil dito, sinabi ng gobernador na mararanasan ang mas mahigpit na patakaran kapag sundalo na ang magpapatupad ng ECQ sa lalawigan.
Makikipag-ugnayan din si Remulla kay Interior and Local Government Sec. Eduardo Año para magamit ang mga tauhan ng Philippine Army at mga reservists upang italaga sa lalawigan.
“Nakiusap na po ako sa ating Provincial Director na tawagin na ang ating mga kaibigan sa AFP na maghanda, mag-deploy ng AFP dito sa Cavite. Ako po ay makikipag-ugnayan kay Sec. Año na gamitin na ang Philippine Army at reservist para pairalin ang ECQ sa Cavite. Mamayang gabi ay babalitaan ko kayo sa aking mga panayam,” ani Remulla kahapon.
Sinabi ni Remulla na kailangan niya itong gawin upang tumino ang 10% na pasaway sa Cavite at maisalba ang 90% na sumusunod sa ECQ.
- Latest