Mga ospital na tatanggi sa maysakit sususpendihin

MANILA, Philippines — Nagbabala si Pa­ngulong Rodrigo Duterte laban sa mga ospital na tatanggi sa mga maysakit sa gitna ng pagtaas ng bilang ng mga pasyenteng may COVID-19.

Ito ay matapos na makarating sa kanya ang mga ulat nang pagtanggi ng mga ospital sa mga pasyenteng may malalang karamdaman.

“You fail on that, I will relieve all of you sa hospital and you can consider yourself suspended because the written order will follow,” babala ng Pangulo.

Inihalimbawa ng Pangulo ang isang namatay na pasyente sa Cabanatuan na tinanggihan ng anim na ospital.

“Itong namatay...na hindi tinanggap ng anim na hospital. I don’t know if this is true. For example, there’s a patient in the City of Cabanatuan who was refused admission by six hospitals,” sabi ng Pangulo.

Ang pasyente na nasawi ay nakilalang si Ladislao Cabling na nahirapan sa paghinga nang sumpungin ng hika at tanggihan umano ng anim na ospital sa Cabanatuan.

Inatasan ng Pangulo ang Department of Justice na magsampa ng kaso sa mga lumabag lalo na kung ospital ng gobyerno ang sangkot.

 Giit ng Pangulo, maaaring gumawa ng paraan ang isang ospital katulad ng pagkuha sa isang lugar kung saan maaaring ilagay ang pasyente.

“Kaya lahat na magkasakit, heart attack, appendicitis, pumutok ang kung anong puputok diyan, pumutok ‘yung utak, especially government hospital, my order is: must accept admission,” dagdag nito.