AWOL na pulis na inakusahang nangholdap, itinumba

MANILA, Philippines — Idineklarang dead-on-arrival sa ospital ang isang tinyenteng pulis na AWOL matapos pagbabarilin ng hindi pa kilalang gunman habang nakatambay sa harap ng kanyang bahay kahapon ng tanghali sa Brgy. San Fermin, Cauayan City, Isabela.

Batay sa ulat, alas-12:45 ng tanghali ay nakatambay ang biktima na kinilalang si P/Lt. Oliver Tolentino nang lapitan ng nag-iisang suspek at pagbabarilin.

Matatandaan na inaresto pasado hatinggabi noong Marso 29 si Tolentino matapos niyang lampasan habang sakay ng kanyang kotse ang isang checkpoint sa Reina Mercedes kung saan may hinoldap na gasolinahan ilang oras ang nakalipas at siya ang pinagbibintangan na nangholdap. Siya ay kinasuhan ng illegal possession of firearms at paglabag sa curfew subalit ang sinasabing tinangay na P200,000 mula sa gasolinahan ay hindi narekober.