Solo parent na pulis exempted sa duty
MANILA, Philippines — Hindi na pinagdu-duty bilang frontliner ni Philippine National Police (PNP) Chief P/Gen. Archie Gamboa ang mga pulis na solo parent o mag-isang bumubuhay sa kanyang pamilya sa gitna na rin ng banta ng COVID-19 pandemic.
Iniutos din ni Gamboa na para naman sa mag-asawang pulis ay isa lamang sa kanila ang magdu-duty sa national health emergency at ang ka-partner ay sa mga administrative at support duties itatalaga.
Ayon naman kay PNP Spokesman P/Brig. Gen. Bernard Banac, ikinonsidera ni Gamboa ang inisyatibong ito upang bigyang proteksyon ang kapakanan ng mga miyembro ng pamilya partikular ang mga anak ng mga pulis.
Inatasan na ni Gamboa si P/Major Gen. Reynaldo Biay, Director for Personnel and Records Management na magsagawa ng accounting sa mga solo parent ng PNP gayundin sa mga mag-asawang pulis na nasa frontline duties o naka-deploy tulad sa mga checkpoint kaugnay ng paglaban sa COVID 19.
Binigyan din ng direktiba ni Gamboa si P/Brig. Gen. Marni Marcos Jr., Acting Director for Comptrollership na makipagkoordinasyon sa mga pribadong lending institutions para suspindihin muna ang pagkaltas sa mga loan ng mga pulis.
- Latest
