Quezon City drug bust: Pusher huli sa P14 milyong shabu
MANILA, Philippines — Isang drug suspect ang naaresto ng mga pulis sa isang buy-bust operation at nasa mahigit P14 milyong halaga ng shabu ang nakumpiska, kamakalawa ng gabi sa Novaliches, Quezon City.
Ang naarestong suspek ay kinilalang si Regine Legaspi, 31, residente ng 8 Sampaguita St., Navotas City.
Sa ulat, dakong alas-10:56 ng gabi nang maaresto ng mga pulis ang suspek sa Room 46 ng Starcia Apartelle, na matatagpuan sa Quirino Highway, Brgy. Bagbag, Novaliches.
Bago ito ay unang naaresto noong Marso 28 sina Ronnel Grifalda, 35, ng Caloocan City, at nakumpiskahan ng mahigit P2 milyong halaga ng shabu sa loob din ng Starcia Apartelle at ikinanta nito si Legaspi kaya’t nagsagawa ng isa pang buy-bust operation at isang poseur buyer ang nagkunwaring bibili ng P130,000 halaga ng shabu at nagkasundo na magkikita sa naturang apartelle.
Nang maisagawa ang transaksiyon, kaagad inaresto ang suspek na nagresulta sa pagkakumpiska ng mahigit dalawang kilo ng shabu na nagkakahalaga ng P14,280,000.
Narekober din ang P130,000 boodle money na may isang genuine na P1,000 marked money, digital weighing scale, cell phone na ginamit sa drug transaction at drug paraphernalia.
- Latest