Magsasaka inutas sa bahay

MANILA, Philippines — Namatay noon din ang isang 47-anyos na magsasaka matapos pagbabarilin ng walong armadong lalaki na pinaniniwalaang mga kasapi ng New People’s Army (NPA) sa kanilang bahay sa Zone-1, Brgy. Bahay sa bayan ng Caramoan, Camarines Sur kamakalawa ng gabi.

Ang nasawing biktima dahil sa mga tama ng bala sa iba’t ibang bahagi ng katawan ay nakilalang si Eddie Velasco Clores, may asawa at residente ng nasabing barangay.

Sa salaysay ng misis ng biktima na si Jacquiline, dakong alas-8:50 ng gabi habang nasa loob sila ng kanilang bahay nang dumating ang mga armadong kalalakihan at walang kaabog-abog na pinagbabaril ang kanyang mister.

Malaki ang hinala ng pulisya na ang biktima ay posibleng nagbibigay ng impormasyon sa mga otoridad.