P500 hazard pay sa government employees, inaprub ni Duterte
MANILA, Philippines — Inaprubahan na ni Pangulong Rodrigo Duterte na bigyan ng P500 kada araw na hazard pay ang mga empleyado ng gobyerno na pisikal na magre-report sa trabaho habang nasa ilalim ng enhanced community quarantine ang buong Luzon dahil sa COVID-19.
Ang kautusan ay nakapaloob sa Administrative Order 26 na nilagdaan ng Pangulo kahapon, Marso 23.
Magsisimula naman sa Marso 17 ang pagbabayad ng hazard pay.
Bukod sa mga empleyadong regular ang posisyon, makakatanggap din ng hazard pay ang mga kontraktuwal, nagtatrabaho sa pamamagitan ng contract of service (COS) at job order (JO) sa national government agencies (NGAs), state universities and colleges (SUCs) at mga government owned or-controlled corporations (GOCCs).
Ang mga public health workers, public social workers, science and technology personnel at military at uniformed personnel ay maaaring mabigyan ng COVID-19 hazard pay kung ito ay mas mataas sa kanilang tinatanggap na hazard pay sa ilalim ng umiiral na batas.
Ang pagbibigay naman ng COVID-19 hazard pay sa mga empleyado ng mga local government units (LGUs) at local water district (LWD) employees ay ibabatay sa kakayahang pinansiyal ng kanilang local government at board of directors. Kung kulang ang pondo at hindi aabot sa P500, maaaring ipagkaloob ang mas mababang hazard pay pero dapat maging pantay-pantay ang pagbibigay. Kuwalipikado ring makatatanggap ng hazard pay ang mga empleyado ng Senado, House of Representatives, Hudikatura, Office of the Ombudsman at iba pang independent constitutional bodies.
- Latest