Iklian ang lamay para iwas virus
MANILA, Philippines — Upang maiwasan ang pagtitipon ng maraming tao sa lamayan dahil sa banta ng COVID-19 ay iniutos ni Isabela Governor Rodolfo Albano III ang agad na paglibing sa mga patay mula 24 oras hanggang tatlong araw.
Sinabi ni Albano na hindi lamang public mass gathering ang paghihigpitan ng kanyang pamunuan kundi pati na rin ang pribadong pagtitipon gaya ng lamayan sa patay.
Isa sa mga potensiyal na pinagmumulan ng pagkahawa sa COVID-19 ay ang pagdadalo sa burol ng patay na malimit dinadaluhan ng mga bisitang mula ibang bansa at lugar na may kumpirmadong kaso ng virus.
Anya, dahilan ng mahabang burol ng namatayan ay ang kawalan ng pera upang maipalibing agad ang yumao ay napipilitan magpasugal ang mga naulila upang makaipon ng “tong” na pandagdag sa gastos ng pagpapalibing.
Kaya’t magbibigay ng tulong ang provincial government sa pinansiyal o kaya ay kabaong at pagpapalibing anuman ang dahilan ng pagkakamatay ng yumao.
Ayon kay Albano, nasa diskresyon ng mga alkalde kung pahihintulutan nila ang mga burol ng patay sa kanilang teritoryo mula 24 oras hanggang tatlong araw lamang.
Ang guidelines sa maiksing burol ay habang umiiral lamang ang Luzon “enhanced community quarantine na idineklara ni Pangulong Rodrigo Duterte upang maibsan ang pagkalat ng COVID-19.
- Latest