Karnaper ng motor, patay sa shootout
MANILA, Philippines — Isa sa dalawang magnanakaw ng motorsiklo ang nasawi nang ito umano ay manlaban sa mga pulis, naganap kahapon ng madaling araw sa Caloocan City.
Inaalam pa ang pagkakakilanlan ng suspek na inilarawan na nakasuot ng navy blue jacket at puting cap habang nakatakas ang hindi rin nakilalang kasama nito.
Ayon kay Caloocan deputy police chief for administration P/Lt. Col. Ilustre Mendoza, bago ang barilan, sakay ng isang Yamaha Mio ang 17-anyos na si alyas “Teofando” at ang kaibigan nitong si John Romy Torrado, 23, dakong ala-1:30 ng madaling-araw nang harangin ng mga suspek sa kanto ng Nadurata St. at 7th Avenue.
Upang hindi makasigaw at makahingi ng tulong ay tinutukan sa nguso ng baril ng mga suspek sina Teofando at Torrado bago sapilitang kinuha ang mga gamit ng dalawa at tinangay din ang kanilang motorsiklo saka tumakas patungong Barangay 12.
Humingi ng tulong sa mga pulis sina Torrado at Teofando kaya’t nagkasa ng follow-up operation ang mga tauhan ng Station Intelligence Branch (SIB) sa pangunguna ni P/Maj. Raymond Nicolas at dakong alas-2:35 ng madaling araw nang maispatan ang mga suspek sa Block 39, Sabalo Street.
Nang matunugan ng mga suspek na may mga parak sa paligid ay binunot ng mga ito ang kani-kanilang mga kargada at sunud-sunod na pinaputukan ang mga pulis.
Gumanti ng mga putok ang mga pulis kung saan isa sa dalawang suspek ang tinamaan na naging sanhi ng kamatayan nito.
- Latest