Kelot tumalon sa LRT, tigok
MANILA, Philippines — Patay ang isang 47-anyos na lalaki matapos tumalon mula sa istasyon ng LRT-1 at lumagapak pa sa ibabaw ng isang pampasaherong jeepney bago bumagsak sa kalsada, naganap sa Quezon City, kahapon ng tanghali.
Dead-on-arrival sa sa Quezon City General Hospital ang biktimang si Ronelo Pampilon, 47, runner sa money changer company, at residente ng Lot 16, Blk 7, S35, Belleview Meadows Subdivision, Bagtas, Tanza, Cavite dahil sa matinding pinsalang tinamo sa ulo at katawan.
Batay sa ulat ng La Loma Police Station sa Quezon City Police District (QCPD), nabatid na dakong alas-12:00 ng tanghali nang maganap ang insidente sa East Side Platform ng LRT Balintawak Southbound Station, Brgy. Apolonio Samson, Quezon City.
Sa imbestigasyon, lumilitaw na umakyat ang biktima sa East Side Platform ng LRT-1 Balintawak Station, at saka bigla na lang tumalon sa ’di pa batid na kadahilanan.
Sinasabing bago ang suicide ay may kausap pa umanong babae ang biktima na tila nag-aaway.
Ayon sa ilang tindera sa lugar na nakasaksi sa pangyayari, bumagsak pa umano ang biktima sa ibabaw ng isang passenger jeepney na nagsasakay ng mga pasahero sa lugar, bago tuluyang bumagsak sa kalsada.
Kaagad namang rumesponde ang mga awtoridad at isinugod ito sa pagamutan ngunit idineklara na ring patay ng mga doktor.
- Latest
