4 pang Pinoy seaman sa Japan, nagpositibo sa nCoV
MANILA, Philippines — Inihayag ng Department of Foreign Affairs na umakyat na sa 5 Pinoy seaman na may 2019 novel coronavirus (nCoV) sa Japan matapos magpositibo sa virus ang apat pang sakay ng Diamond Princess cruise ship.
Katulad ng unang Pinoy na nagpositibo sa nCoV, ang apat ay mga crew members din ng Diamond Princess.
“The DFA, through the Philippine Embassy in Tokyo, confirms that four other Filipinos aboard Diamond Princess tested positive for the novel Coronavirus (nCoV) yesterday, 10 February 2020, bringing to five the number of positive cases. They are now being treated in hospitals in Japan,” nakasaad sa statement ng DFA.
Ang lahat ng sakay ng cruise ship ay sumasailalim sa quarantine at nakadaong sa Yokohama, Japan.
Patuloy pa ring nakikipagtulungan ang embahada sa mga otoridad ng Japan upang mabigyan ng tulong ang iba pang Filipino na nasa barko.
Una nang sinabi ni Labor Secretary Silvestre Bello III na pagaling na ang unang Filipino na nagpositibo noong nakaraang linggo.
Nabatid na nasa 3,700 ang sakay ng cruise ship kabilang ang 530 Pinoy.
- Latest
