30 Pinoy galing Wuhan dumating na
MANILA, Philippines — Inihayag ng Department of Foreign Affairs (DFA) na nakauwi na ng Pilipinas ang 30 Filipino mula sa Wuhan City, China.
Ang Wuhan City ang ground zero ng 2019 novel coronavirus Acute Respiratory Disease (2019-nCoV ARD).
Sa inilabas na pahayag, sinabi ng DFA na lulan ang 29 Filipino at isang sanggol ng chartered flight na lumapag sa Haribon Hangar sa Clark Air Base, pasado alas-8:20 kahapon ng umaga.
Bago bumaba ng eroplano, muling isinailalim sa thermal scanning ang balik-bansang mga Pinoy.
Kasama ng mga napauwing Filipino ang team na kinabibilangan ng dalawang opisyal mula sa Philippine Consulate General sa Shanghai, tatlo mula sa DFA Office of the Undersecretary for Migrant Workers’ Affairs (OUMWA), at limang medical team members mula sa Department of Health (DOH)
Pagdating ng Pilipinas, ligtas na inilipat ang mga Filipino mula sa eroplano patungo sa mga bus para madala sa Athlete’s Village sa New Clark City, Tarlac kung saan dito isasagawa ang 14 araw na mandatory quarantine sa mga ito.
Matatandaang lumipad ang team patungong Wuhan City, Sabado ng gabi, para masundo ang mga Filipino pauwi ng Pilipinas.
- Latest