Totoy hulog sa trike, pisak sa trak
MANILA, Philippines — Nasawi noon din ang isang 12-anyos na totoy matapos magulungan ng isang trailer truck makaraang mahulog sa sinasakyang tricycle sa kahabaan ng highway sa Brgy. Tabuating, sa bayan ng San Leonardo, Nueva Ecija, noong Biyernes ng umaga.
Ang nasawing Grade 6 student ay kinilalang si Melmar Lorme, residente ng Brgy. Del Pilar, San Fernando, Pampanga.
Putuloy namang pinaghahanap ng mga otoridad ang tumakas ng driver ng nakasagasang truck (NAY-4429) sa biktima.
Sa ulat, dakong alas-10:45 ng umaga, sakay ang biktima ng kanilang tricycle na minamaneho ng kanyang ama at patungo sa Cabanatuan City habang ang trailer truck ay pasalungat naman o patungo sa direksyon ng lalawigan ng Bulacan.
Sa hindi mabatid na kadahilanan ay bigla umanong inokupa ng nasabing trailer truck ang linya ng tricycle. Upang maiwasan umanong masalpok ng truck ay kinabig ng tatay ng biktima ang manibela at na-swak ang kanyang sinasakyan sa malalim-lalim na bahagi ng kalsada na nagresulta sa pagkalaglag ng biktima sa sementadong national highway at dito na aksidenteng nagulungan ng trailer truck ang batang biktima.
Hindi naman sinabi sa ulat kung nasaktan din ang ama ng bata.
- Latest