Dalaga pinasok, kinaladkad palabas ng bahay bago pinatay
MANILA, Philippines — Dead-on-the-spot ang isang 26-anyos na dalaga nang pasukin sa loob ng bahay at saka kinaladkad palabas bago pinagtulungang tadtarin ng taga ng dalawang ‘di pa nakikilalang lalaki sa Sitio San Roque, Brgy. Rizal sa bayan ng Monreal, Masbate kamakalawa ng gabi.
Tigmak sa sariling dugo nang matagpuan ng mga kaanak na may 30-metro ang layo mula sa kanilang bahay ang biktimang si Shiela Arizala, residente ng nasabing barangay.
Ayon sa ulat, dakong alas-7:00 ng gabi habang nag-iisa sa loob ng kanilang bahay si Arizala nang puwersahang pumasok ang hindi nakilalang mga lalaki na armado ng itak.
Kinaladkad ang biktima palabas ng kanilang bahay at nang sa di-kalayuan ay pinagtulungang pagtatagain sa kabila nang palahaw at pagmakaawa nito.
Tumakas ang mga suspek makaraang patay na bumulagta ang biktima.
Hindi pa malaman ang pagkakakilanlan at motibo ng mga suspek habang patuloy ang ginagawang imbestigasyon.
- Latest