12 medical supply store kakasuhan ng DTI
MANILA, Philippines — Kasong kriminal at administratibo ang kakaharapin ng 12 tindahan ng medical supply na nagsamantala umano at labis na nagtaas ng presyo sa itinitinda nilang N95 mask pagkaraan ng pagsabog ng Bulkang Taal.
Sinabi ni Trade Undersecretary Ruth Castelo na 12 sa 17 establisimyento na kanilang ininspeksyon sa Bambang, Maynila ay kakasuhan ng ‘profiteering’ base sa Consumer Act of the Philippines.
Pinaalala ng DTI na may ipinatutupad na price freeze sa mga pangunahing bilihin sa mga apektadong lugar ng pagsabog habang nag-isyu rin ang Department of Health ng price freeze sa mga produktong medikal tulad ng mga gas at face masks, nebulizer, at iba pang gamot.
Nakipag-ugnayan na rin ang DTI sa mga nangungunang manufacturers at retailers ng mga medical supplies tulad ng mga kilalang drug store, nangakong hindi gagalawin ang presyo ng kanilang mga produkto partikular na ang N95 masks at agad na magre-restock.
Habang hindi pa dumadating ang mga bagong stock ng N95 masks, dadalhin muna ang mga stock nila sa mga sangay na hindi apektado ng ash- fall sa mga tindahan nila sa CALABARZON at Metro Manila.
- Latest