Beterinaryo itinumba ng tandem

MANILA, Philippines — Namatay noon din ang isang beterinaryo nang pagbabarilin ng dalawang lalaking sakay ng isang motorsiklo kahapon ng madaling araw sa Brgy. Biasong, Talisay City, Cebu.

Ang nasawing biktima na nagtamo ng mga tama ng bala sa iba’t ibang bahagi ng katawan ay kinilalang si Neil Pala Boligao, 48, residente ng Brgy. Cansojong sa Talisay City.

Sa ulat ni Police Regional Office (PRO) 7 Director Police Brig. Gen. Valeriano de Leon bago nangyari ang pananambang sa biktima, alas-2:30 ng madaling araw sa Sitio Maanyag, Brgy. Biasong, Talisay City ay kasalukuyang bumibiyahe ang biktima lulan ng kaniyang Hi Lux Toyota pauwi sa kanilang bahay nang sumulpot ang isang motorsiklo lulan ang dalawang suspek at pagbabarilin ang biktima. 

Nang masigurong napatay ang biktima ay mabilis na tumakas ang mga suspek.