‘The most honest one’ bilang PNP chief, hanap pa rin ni Duterte
MANILA, Philippines — Patuloy pa rin ang ginagawang paghahanap ni Pangulong Rodrigo Roa Duterte sa “the most honest one” na itatalagang pinuno ng Philippine National Police (PNP).
Ito ang sinabi ni Senator Christopher “Bong” Go matapos na wala pa ring mapiling kapalit ni dating PNP chief Oscar Albayalde kahit patapos na ang 2019.
Sinabi ni Go na bukas pa rin ang option ng Pangulo at sinabihan din siya na pabayaan na munang magtrabaho ang buong puwersa ng PNP laban sa iligal na droga at kriminalidad.
“As far as I know, most likely wala pa po. Sabi niya diyan muna, hayaan mo muna ‘yung ganung set-up, mag-trabaho muna silang lahat at ipakita nila lahat ang kampanya laban sa droga, sugpuin ang kriminalidad,” sabi ni Go.
Nauna nang napaulat na kabilang sa pinagpipilian ng Pangulo ay sina Lt. General Camilo Cascolan, Lt. General Archie Gamboa at Major General Guillermo Eleazar.
Sinabi pa ni Go na magagaling naman lahat ng mga kandidato pero hinahanap ng Pangulo ang pinaka-matapat.
- Latest