Ex-pulis at aktibong pulis, nagbarilan

Away-kalsada…

MANILA, Philippines — Nagbarilan ang isang dating pulis at aktibong pulis matapos na magbanggaan ang kanilang motorsiklo sa naganap na road rage na ikinasawi ng isa sa kanila naganap sa highway ng Brgy. Mayapa, Calamba City, Laguna.

Kinilala ni Laguna Provincial Police Office (PPO) Director Police Colonel Eleazar Matta ang nasawi na si Police Lt. Ramil Gonzales, na nagtamo ng mga tama ng bala sa iba’t ibang bahagi ng katawan at nagsasanay sa Officers Basic Course (OBC sa National Police Training Institute (NPTI) sa Camp Vicente Lim, Calamba City.

Nasa kritikal namang kondisyon ang nakabarilan nito na si Jujardin Velasco, isang retiradong pulis na nagtamo ng dalawang tama ng bala sa dibdib at isa sa kaliwang balikat.

Sa ulat, bago naganap ang barilan ng dalawa, bandang alas-8:30 ng gabi sa harapan ng isang tindahan sa Brgy. Ma­yapa, Calamba City ay kalalabas lang ng kampo ni Gonzales na nagmamaneho ng motorsiklo nang magbanggaan sila ni Velasco na nagmomotor din.

Kapwa bumagsak ang dalawa sa kanilang sinasakyang motorskilo at nang bumangon ay kapwa bumunot ng baril at nagbarilan sa gitna ng kalsada.

Kapwa bumulagta ang dalawa na dinala sa ospital, subalit idineklarang dead on arrival si Gonzales habang nasa kritikal na kalagayan si Velasco.