500K inilikas sa bagsik ni Tisoy
MANILA, Philippines — Pumalo na sa halos 500,000 residente mula sa Bicol Region, Visayas Region, at Luzon ang naapektuhan sa pananalasa at bagsik ng bagyong Tisoy, habang apat ang iniulat na nasawi at lima ang sugatan, ayon sa pinagsamang ulat ng pulisya , Office of Civil Defense (OCD) at National Disaster Coordinating Council (NDRRMC) nitong Martes.
Naitala sa 89,973 pamilya o kabuuang 358,958 katao ang apektado ng bagyo sa Bicol Region na nasa loob at labas ng mga evacuation center habang walang kuryente sa malaking bahagi ng Albay, Catanduanes, Sorsogon at Camarines Sur.
Nasa 12,638 pamilya o kabuuang 41,058 058 katao ang nasa mga evacuation centers partikular na mula sa lalawigan ng Cavite, Laguna, Batangas at Quezon. Karamihan ng evacuees sa Region IV A ay mula sa Quezon na aabot sa 32,703.
Sa MIMAROPA, aabot naman sa 4, 434 pamilya o katumbas na 18, 446 katao ang inilikas partikular na mula sa mga lalawigan ng Marinduqe, Romblon, Oriental at Occidental Mindoro.
Apat naman ang iniulat na nasawi na sina Marco Paulo Ursua, 33-anyos matapos makuryente sa Libmanan, Camarines Sur dakong alas -10 ng umaga nitong Lunes, habang dakong alas-4:30 naman ng hapon ay nasawi rin si Joel Beledio, 38, obrero, matapos na mabagsakan ng malaking sanga ng puno ng Gemelina na itinumba ng malakas na hangin sa Ormoc City, Leyte.
Samantalang kinumpirma naman ni Oriental Mindoro Gov. Bonz Dolor, dalawa ang patay sa kanilang lalawigan, isa rito ay 59-anyos na mister na nadaganan ng sanga ng nabuwal na punong kahoy sa bayan ng Baco at isa pa sa bayan naman ng Pinamalayan na nabagsakan ng debris sa loob ng kanilang bahay.
Sugatan naman ang dalawa na mula sa Polangui, Albay na kinilala ang isa sa mga ito na si Bien Paul Panis, 35, na nadaganan ng nabuwal na puno habang ang tatlong iba pa ay mula naman sa lalawigan ng Samar sa Visayas Region.
Kinilala naman ang nawawala na si Dioluo Agam, 27, na nilamon ng malakas na ragasa ng ilog sa Brgy. Quinatuyan, Maayon, Capiz dakong alas-5:20 ng hapon.
Sa kasalukuyan, patuloy naman ang pamamahagi ng relief goods ng lokal na pamahalaan sa mga naapektuhang residente.
- Latest