Kelot niratrat habang namamalengke

MANILA, Philippines — Nasawi noon din ang isang 30-anyos na binata matapos lapitan at pagbabarilin ng dalawang hindi nakilalang suspek habang namamalengke sa Brgy. San Ramon sa bayan ng Uson, Masbate kamakalawa ng umaga.

Napuruhan sa katawan ang biktimang kinilalang si Ryan “Nonoy” Dalanon Lacson, residente ng Brgy. San Antonio sa bayan ng Milagros.

Sa ulat, dakong alas-7:30 ng umaga habang namamalengke ang biktima sa talipapa ng barangay nang lapitan ng dalawang hindi nakilalang gunmen at sa hindi malamang dahilan ay bigla itong pinagbabaril.

Agad na duguang bumulagta ang biktima makaraang mapuruhan ng punglo sa katawan habang nagmamadaling tumakas ang mga salarin sa hindi malamang direksyon.

Nakuha ng mga pulis sa lugar ang ilang basyo ng bala ng kalibre .45 baril.