FEU student na ni-recruit para maging NPA rebels, nasagip
MANILA, Philippines — Isang estudyante ng Far Eastern University (FEU) na ni-recruit ng Anakbayan upang sumapi sa organisasyon ng CPP-New People’s Army (NPA) ang matagumpay na nasagip ng mga operatiba ng PNP-Criminal Investigation and Detection Group (PNP-CIDG) sa rally sa harapan ng unibersidad sa Morayta sa Maynila.
Sa ulat ni PNP-CIDG Director Police Brig. Gen. Joel Napoleon Coronel, dakong alas-2:15 ng hapon nitong Huwebes nang masagip ang estudyante ng FEU na kinilalang si Lerevie Caalaman.
Nailigtas ng PNP-CIDG operatives si Lerevie, matapos dumulog sa tanggapan ng PNP-CIDG ang ina ng biktma na si Gng. Elvie Caalaman na sinabing sumapi ang kaniyang anak sa Anakbayan na front organization ng CPP-NPA na aktibong nagre-recruit ng mga kabataang estudyante para maging miyembro ng komunistang kilusan.
Sa salaysay ng ginang, nagpahatid ng mensahe sa kaniya ang anak noong gabi ng Nobyembre 20 na sinabing nais na niyang umuwi dahilan sa nahihirapan na siya sa pamumundok at sinabi nitong madalas din gamitin ang mga recruits na estudyante sa mga rally upang kondenahin ang pamahalaan.
Ayon sa biktima, bababa sila sa Maynila upang lumahok sa rally sa harapan mismo ng FEU kaya dito na ikinasa ang operasyon.
Matapos ang monitoring at surveillance operation ay itinuro ng ginang sa mga otoridad ang kaniyang anak kaya agad itong iniligtas ng mga operatiba buhat sa hanay ng mga raliyista ng militanteng grupo.
Si Gng. Caalaman ay isa sa mga tumatangis na ina sa mga nawawala nilang estudyanteng anak na ni-recruit umano ng mga militanteng grupo na kaalyado ng NPA rebels.
- Latest