Misis na OFW inutas ng mister
MANILA, Philippines — Inatado ng taga ng isang mister ang kanyang misis na isang overseas Filipino worker (OFW) matapos ang mainitang pagtatalo, kamakalawa sa Brgy. Dumadalig, Tantangan, South Cotabato.
Ang biktima na namatay noon din dahil sa mga tinamong taga sa iba’t ibang katawan ay nakilalang si Denelyn Mara, 28, residente ng Purok Kaunlaran, Brgy. Bukaypait ng nasabing munisipalidad.
Ang suspek na kinasuhan ng parricide ay ang mister nitong si Roel John Mara, 38.
Sa ulat ng pulisya, bago nangyari ang krimen bandang alas-8:50 ng umaga sa kanilang bahay ay biglang dumating ang suspek at dito ay nagkaroon ng mainitang pagtatalo ang mag-asawa tungkol sa kanilang pagsasama.
Lumalabas sa imbestigasyon ng pulisya na madalas nag-aaway ang mag-asawa dahil sa pagiging seloso ng mister kaya’t nais na ng ginang na ito ay hiwalayan.
Sa kalagitnaan nang pagtatalo ay kumuha ng itak ang biktima para takutin ang mister at umalis na sa bahay nang ito ay maagaw ng huli.
Dito ay inundayan ng suspek nang sunud-sunod na taga ang misis hanggang sa duguang bumulagta kaya’t tumakas ang una.
Nagawa pang maisugod sa South Cotabato Provincial Hospital ang biktima, subalit ito ay idineklarang dead on arrival dahilan sa malalim na sugat na tinamo sa katawan.
- Latest
