‘Perfect’ PNP chief hanap ni Duterte
MANILA, Philippines — Kaya wala pa ring itinatalaga na hepe ng Philippine National Police (PNP) si Pangulong Rodrigo Duterte dahil naghahanap pa ito ng “perfect” na matapat na opisyal.
Ito ang sinabi kahapon ni Sen. Christopher Lawrence “Bong” Go matapos matanong kung bakit wala pang napipiling PNP chief matapos opisyal na magretiro noong Nobyembre 8 si dating PNP chief Oscar Albayalde.
“Yung hinahanap nya na honest ay still searching pa po si Pangulong Duterte…Hirap na hirap syang hanapin yung perfect na honest man na hinahanap nya,” sabi ni Go.
Una nang isinumite ni Interior Secretary Eduardo Año ang pangalan nina PNP officer-in-charge Lieutenant General Archie Francisco Gamboa, deputy chief for operations Lieutenant General Camilo Cascolan, at Chief of the Directorial Staff Major General Guillermo Eleazar para ikonsidera ng Pangulo.
Agad nilinaw ni Go na maari namang iba ang mapili ng Pangulo o wala sa tatlo.
“Ibig sabihin ay posibleng lumabas dyan sa tatlo ang kanyang pipiliin,” sabi ni Go.
Matatandaan na naging kontrobersiyal ang pagbaba sa puwesto ni Albayalde matapos masangkot ang pangalan nito sa mga dati niyang tauhan sa Pampanga na inakusahang sangkot sa pagre-recyle ng shabu.
- Latest