3 rider patay sa road accident
MANILA, Philippines — Tatlong motorcycle rider ang nasawi sa magkakahiwalay na aksidente sa kalsada sa Valenzuela City, Caloocan City at Dasmariñas City, Cavite.
Namatay sa semplang ang rider na si Jan Marcus Francisco, 23, kahapon ng alas-12:45 ng madaling araw sa kahabaan ng M.H. Del Pilar, Brgy. Arkong Bato, Valenzuela City.
Sa ulat, binabagtas ni Francisco ang kalsada galing sa Malabon patungo sa Brgy. Polo sakay ng kaniyang Nmax type scooter nang biglang mawalan ng kontrol at sumemplang.
Tumilapon sa scooter si Francisco at bumagsak sa bakal na poste sanhi para magtamo siya ng matinding pinsala sa ulo at katawan na dahilan ng kaniyang pagkasawi.
Patay din ang rider na si Fitch Burch Dela Cruz, 32, nang mabangga at magulungan pa ng isang pampasaherong bus habang binabagtas ang kahabaan ng Commonwealth Avenue, Quezon City kahapon ng alas-6:15 ng umaga.
Sakay ang biktima ng kanyang Yamaha motorcylcle na may plakang KZ-7371 nang mabangga ng Golden Dragon bus na biyaheng Fairview, dahilan para sumemplang ito at nagulungan ng bus.
Sa Molino-Paliparan Road, Brgy. Salawag, Dasmariñas City, Cavite ay nasawi ang rider na si Virgilio Felipe Jr., 26, habang nasa malubhang kalagayan ang angkas nitong si Benjamin Roldan, 32 nang sila ay masalpok ng isang van na minamaneho ni David Mambanon Jr., 45, residente ng Blk. 24, Lot 17, Teacher’s Village, Brgy. San Gabriel, GMA, Cavite.
Nabatid na kapwa mabilis ang takbo ng dalawang sasakyan at nang mapadaan na sa pakurbang kalsada ay kapwa hindi sila nakapagmenor kaya’t nagsalpukan.
- Latest