ACT-CIS, ibinunyag ang anomalya sa pagkuha ng passport
MANILA, Philippines — Matapos mabisto ang anomalya sa pagkuha ng pasaporte nang masagip ang isang OFW sa Saudi Arabia na gumamit ng pekeng birth certificate ay nanawagan si ACT-CIS Partylist Rep. Eric Yap kay Department of Foreign Affairs (DFA) Sec. Teddy ‘Boy’Locsin na imbestigahan ang natuklasan nilang anomalya sa pag-iisyu ng passport gamit ang mga pekeng birth certificate at NBI clearance.
Nabisto ni Cong. Yap ang nasabing anomalya matapos ma-rescue ang isang OFW sa Saudi Arabia kamakailan na gumamit ng pekeng birth certificate.
“Pinalitaw na 21 years old na ang OFW, gayung 20 years old pa lamang pero nakalusot siya at nabigyan ng passport ng DFA,” ani Cong. Yap.
Base sa batas, kailangan 21 years old ang isang OFW para makapasok at makapagtrabaho sa Saudi Arabia.
“Deliberately pineke ang kanyang edad ng kanyang agency para makapunta ng Saudi, pero bakit nakalusot sa DFA?” tanong ng bagitong Congressman.
Naniniwala si Cong. Yap na may sindikato sa DFA na nalalapitan o nababayaran ng mga tiwaling agency para makakuha ng passport ang kanilang nare-recruit.
Lumapit sa ACT-CIS ang mga magulang ng OFW dahil muntik ng ma-rape, hindi pinapakain at hindi binibigyan ng pahinga ang kanilang anak ng kanyang among Arabo.
Nakipag-ugnayan ang ACT-CIS sa Overseas Worker Welfare Administration (OWWA) para masundo ang nasabing OFW sa bahay ng kanyang amo.
Nakauwi na ng bansa at sa kanilang probinsiya sa Compostela Valley sa Mindanao ang naturang OFW sa tulong ng ACT-CIS.
- Latest
