PDEA lilinisin ang 18K barangay sa droga
MANILA, Philippines — Mahigit 18,000 barangay sa buong bansa ang target ng Philippine Drug Enforcement Agency (PDEA) na linisin mula sa proliperasyon ng ilegal na droga.
Inamin ni PDEA Director General Aaron Aquino na 44.5 porsiyento ng 42,045 barangay sa buong bansa ang nananatiling mayroon pa ring problema sa ipinagbabawal na gamot kaya’t desidido silang masolusyunan ang naturang problema.
Sinabi ni Aquino na sa 18,712 barangays ay 7,817 ang itinuturing na ‘slightly affected’ ng ilegal na droga; 10,616 ang ‘moderately affected’ habang 279 barangays ang itinuturing na ‘seriously affected.’
Anang PDEA, kinaklasipika ang barangay bilang ‘slightly affected’ kung may iniulat na presensiya ng drug users doon, habang ‘moderately-affected’ naman ang barangay kung may presensya ng drug pushers at users.
Itinuturing namang ‘seriously affected’ naman ang barangay kung may iniulat na presensiya ng clandestine drug laboratory, warehouse, marijuana plantation, drug den, drug trafficking o smuggling activities, at drug personalities, gaya ng users, pushers, financiers, protectors, cultivators, at manufacturers ng ilegal na droga.
Ang Metro Manila ang may pinakamataas na rate ng barangay na apektado ng narcotics, na may 72%, na sinundan naman ng Central Visayas na may 72.4% naman.
- Latest
