Karambola ng anim na sasakyan: Lady rider utas
MANILA, Philippines — Todas ang isang lady rider nang maipit sa karambola ng anim na sasakyan sa Barangay Barangka Drive, Mandaluyong City kahapon ng umaga.
Ang biktima ay kinilalang si Grace Ann Pajemago, 26, ng 853 Guinhawa Street, Barangay Barangka Drive, Mandaluyong City.
Batay sa ulat ng Mandaluyong City Police, dakong alas-8:15 ng umaga nang maganap ang karambola sa eastbound lane ng Shaw Boulevard, kanto ng Sheridan Street, Mandaluyong City, na kinasangkutan ng anim na behikulo.
Bago ang aksidente ay nawalan umano ng preno ang passenger jeepney na minamaneho ni Wilfredo Paylan sa EDSA Shaw Flyover patungong Pasig at bumangga sa iba pang behikulo.
Nabundol din ng jeep ang biktima at naipit sa isang Sports Utility Vehicle (SUV) na nagresulta sa pagkamatay nito.
Nagdulot naman ng pagsisikip ng daloy sa lugar ang naturang aksidente.
- Latest