Empleyado dinedo, payroll money tinangay ng tandem
MANILA, Philippines — Dead-on-the-spot ang isang empleyado ng isang travel agency makaraang barilin ng dalawang lalaki na magkaangkas sa isang motorsiklo, kamakalawa ng hapon sa Parañaque City.
Ang nasawi ay kinilalang si Michael Angelo Manuad, nasa hustong gulang at tauhan ng isang travel agency na may tanggapan sa Matthew St., Multinational Village, Parañaque City.
Sa ulat ng Parañaque City Police, dakong ala-1:35 ng hapon nang maganap ang krimen sa may Macapagal Ave., Brgy. Tambo, ng naturang lungsod.
Mag-isang naglalakad ang biktima sa gilid ng City of Dreams Hotel and Casino at bitbit ang isang bag na naglalaman ng payroll money ng kanilang kumpanya na aabot sa P900K
Dito ay hinarang siya ng dalawang salarin at agad na binaril saka tinangay ang dalang bag na naglalaman ng pera.
Agad namang tumakas ang mga suspek sa hindi nabatid na direksyon matapos maisagawa ang pakay.
Patuloy ang imbestigasyon ng pulisya sa insidente kung saan pangunahing tinitignan na nagkaroon ng inside job o may nagbigay ng impormasyon sa mga salarin na may dalang malaking halaga ng pera si Manuad.
- Latest
