2 rider patay sa bus
MANILA, Philippines — Dalawang motorcycle rider ang nasawi nang sila ay masalpok ng pampasaherong bus sa magkahiwalay na insidente sa Albay at Isabela.
Ang biktima na idineklarang dead-on-arrival sa Bicol Regional Training and Teaching Hospital ay nakilalang si Anthony Buenaobra Lomenario, 21, ng Purok-2, Brgy. Alobo, Daraga Albay.
Sumuko naman ang driver ng bus na si Richard Rodriguez Amolo, 24, ng Brgy. Mayaopayawan, Milaor, Camarines Sur.
Sa ulat, dakong alas-10:15 ng gabi magkasalubong na binabaybay ang highway ng motorsiklo ng biktima at Amihan Bus Lines (ACC-8535).
Biglang nag-U turn ang biktima dahilan para mabangga ito ng kasalubong na bus at pumailalim.
Namatay din ang kawani ng BIR na si Mark Vincent Balisi matapos masalpok habang nagmomotor ng GV Florida Bus na minamaneho ni Rodel Bumagat, 46, sa National Highway ng Barangay Guibang, Gamu, Isabela kamakalawa ng gabi.
Sa imbestigasyon, alas-11:30 ng gabi ay pauwi na sa Ilagan City si Balisi nang tumbukin ng sumusunod na bus patungong Cagayan nang biglang huminto sa gitna ng kalsada ang kanyang motorsiklo.
Sa lakas nang salpok ay tumilapon sa ere at nagpagulong gulong sa highway si Balisi na kanyang ikinamatay noon din.
- Latest