Palengke pinasabugan: 8 sugatan
MANILA, Philippines — Sugatan ang walong katao kabilang ang isang traffic enforcer makaraang sumabog ang itinanim na bomba sa pamilihang bayan sa Isulan, Sultan Kudarat nitong Sabado ng umaga.
Ang mga biktima na isinugod sa Holy Nazarene Hospital at Sultan Kudarat Provincial Hospital para malapatan ng lunas ay sina Jomar Catalan Aquino, 30; Jay Carnaso, 30; Niño Virgo, 28; Jarem Binaluon, 24; Gulano Salip, 24; traffic enforcer na si Terrencio Cagadas, 35; pawang ng Isulan, Sultan Kudarat; Gerald Cartanega, 28 ng Surallah, South Cotabato; at Richard Arancillo, 45, M, New Lagao, Tacurong
Ayon sa ulat ng mga otoridad, dakong alas-7:00 ng umaga nang mangyari ang pagsabog ng Improvised Explosive Device (IED) sa Public Market ng Isulan, Sultan Kudarat.
Sa imbestigasyon, nabatid na ang pampasabog ay inilagay sa tabi ng isang nakaparadang motorsiklo .
Kasalukuyang abala ang mga tao sa pamamalengke sa lugar kung saan nasa bisinidad din ang traffic enforcer na si Cagadas nang yanigin ng pagsabog ang lugar na ikinasugat ng mga biktima.
Pinaniniwalaan namang ang mga lokal na teroristang Bangsamoro Islamic Freedom Fighters (BIFF) ang nasa likod ng pagpapasabog habang patuloy ang imbestigasyon sa kasong ito.
- Latest
