Batanes, isinailalim sa state of calamity
MANILA, Philippines — Tuluyang idineklara ang buong lalawigan ng Batanes na nasa state of calamity kasunod ng kambal na paglindol na kumitil sa buhay ng 9 na katao, ikinasugat ng 63 iba pa at pagkawasak ng maraming mga bahay at establisyimento.
Ayon kay Batanes Governor Marilou Cayco, ang deklarasyon ay batay sa ipinasang resolusyon ng Sangguniang Panlalawigan ng Batanes para sa agarang tulong sa mga naging biktima ng lindol lalo na ang mga residente ng Itbayat kung saan malubhang napinsala.
Unang isinailalim sa state of calamity ang bayan ng Itbayat dahil sa pagkasawi ng 9 na katao na ikinasugat ng maraming iba pa at pagkawasak ng kanilang mga tahanan.
Sa kasalukuyan ay nananatili pa rin sa mga tent sa open space ng Itbayat Plaza ang mahigit sa 2,000 na katao kung saan takot pa rin ang mga ito na bumalik sa kanilang tahanan dahil sa mga magkakasunod pa rin na pagyanig ng lindol.
Ayon kay Cayco, labis siyang nababahala sa mga residente ng Itbayat dahil sa lamig na nararanasan sa gabi at sobrang init naman sa araw.
Maging ang namumuong sama ng panahaon ay malaki umano ang epekto dahil sa mahihirapan ang pagdating at pagdala ng mga relief goods sa lalawigan kung walang eroplano na makakarating dahil sa sama ng panahon.
- Latest