Bomba sumabog: Misis ng terorista lasog
MANILA, Philippines — Namatay noon din ang isang misis habang nasugatan ang mister nito na miyembro ng Bangsamoro Islamic Freedom Fighters (BIFF) at 10-anyos nilang anak makaraang aksidenteng sumabog ang isang Improvised Explosive Device (IED) sa loob ng safehouse ng teroristang grupo sa Shariff Saydona Mustapha, Maguindanao, kamakalawa.
Kinilala ni Major John Arvin Encinas, Spokesman ng AFP-Western Mindanao (AFP-Westmincom) Spokesman ang nasugatang BIFF member na si Alimoden Masia habang inaalam pa at ang pangalan ng nasugatan nitong anak na lalaki at ang misis nitong nasawi matapos na mapuruhan ng bomba.
Sa ulat, bandang alas-7:00 ng umaga nang maglunsad ng opensiba ang tropa ng militar laban sa nalalabi pang grupo ng BIFF na pinamumunuan ni Abdul Haber Usman alyas Commander Edsrapil, isa sa mga lider ng teroristang grupo sa ilalim ng Bungos faction kung saan mahigit 20 ang miyembro nito kabilang si Masia.
Dahilan sa pagmamadaling tumakas ay aksidenteng napindot ni Masia ang nasabing bomba sa kanilang safehouse sa Brgy. Dasawao, Shariff Saydona Mustapha ng lalawigang ito.
Ang nasabing safehouse ay siyang nagsisilbing launching point ng BIFF sa pambobomba sa North Cotabato at Sultan Kudarat.
- Latest
