Mister binaril habang nagti-text sa harap ng mall
MANILA, Philippines — Isang 29-anyos na mister ang nasawi nang ito ay malapitang barilin ng isang lalaki habang nagti-text sa harap ng isang mall, kamakalawa ng gabi sa Angono, Rizal.
Ang biktima na namatay noon din dahil sa dalawang tama ng bala sa katawan ay nakilalang si Roy Virtudazo Magallano, may asawa, habang nakatakas naman ang suspek sa krimen.
Sa ulat ng Angono Municipal Police Station, dakong alas-7:55 ng gabi ay nakatayo ang biktima at nagti-text sa harapan ng isang kilalang mall sa Manila East Road, Barangay San Isidro nang lapitan ng isang lalaki at walang kaabug-abog na binaril ng dalawang beses sa katawan.
Nang matiyak na patay na ang biktima ay mabilis na tumakbo patawid sa highway ang suspek kung saan niya ipinarada ang kanyang motorsiklo saka tumakas.
Inaalam ng mga otoridad ang motibo at pagkakakilanlan sa suspek.
- Latest