UNHRC huwag papasukin sa Pinas
MANILA, Philippines — Maaaring hindi papasukin ng pamahalaan ang mga taga-United Nations Human Rights Council (UNHRC) na posibleng magtungo sa bansa upang imbestigahan ang mga namatay sa gitna ng kampanya ng gobyerno laban sa ilegal na droga.
Ayon kay Senator Richard Gordon, kahit siya ay hindi pabor na mag-imbestiga sa Pilipinas ang UNHRC dahil lumalabas na kinakaya-kaya lamang nito ang mga malilit na bansa.
Ipinunto ni Gordon na may karapatan ang gobyerno na hindi papasukin sa bansa ang sinuman katulad ng ginawa ng Hong Kong kay dating Foreign Affairs Secretary Albert Del Rosario.
“P’wede (na hindi papasukin), it is the right of any country. Tignan mo si Del Rosario hindi pinapasok sa Hong Kong,” ani Gordon.
Ipinunto pa ni Gordon na hindi nag-iimbestiga ang UNHRC sa malalaking bansa na may napapaulat din ng paglabag sa karapatang pantao katulad ng China, Hong Kong at Amerika.
May ginagawa rin aniya ang gobyerno sa kaso ng mga pagpatay dahil naghe-hearing sa Senado at nag-imbestiga ang Commission on Human Rights.
- Latest