Binata na nakikipaglamay, pinatay

MANILA, Philippines — Hindi na umabot ng buhay sa ospital ang 20-anyos na si Alexis Encallado, ng Masikap St., Tondo, Maynila, binata nang siya ay barilin sa kilikili ng kanyang nakaalitan sa sugalan sa isang lamayan kahapon ng madaling araw.

Ang suspek na tumakas ay kinilalang si “JR Conception”, 26, ng Parola Compound, Tondo.

Sa ulat, bago nangyari ang krimen dakong alas-2:55 ng madaling araw sa lamay ng kapitbahay ng biktima sa Radial Road 10 ay kasugalan nito ang suspek sa tong-its nang magtalo hanggang sa umalis ito.

Ilang minuto ang lumipas ay bumalik ang suspek na armado ng baril at walang kaabog-abog na binaril ang biktima.