2 tulak utas sa drug bust
MANILA, Philippines — Napatay ng mga otoridad ang dalawang lalaking drug pusher habang naaresto ang limang iba pa sa magkakahiwalay na drug buy-bust operations sa mga lungsod ng Cabanatuan at San Jose, Nueva Ecija.
Ang dalawang napatay ay kinilalang sina Christopher Santiago, ng Barangay Fatima; at Alvin Garcia, ng Barangay Valle Cruz, sa lungsod ng Cabanatuan.
Ang limang naaresto ay kinilalang sina Jerome Flores, 21, ng Barangay Bitas, Cabanatuan City; Jervin Domingo, 22, ng Purok Orchid, Barangay San Miguel na Munti, Talavera, Nueva Ecija; Herman Hipolito, 36; Erica Espinosa, 23, dalaga; at Jonathan Roque, 25, binata, pawang mga nakatira sa Zone 10C, Brgy. Abar 1st, San Jose City, Nueva Ecija.
Sa ulat ng Cabanatuan City Police, bandang alas-4:20 ng madaling araw nang magsagawa ng buy-bust operation sa Purok Matulungin, Barangay Barrera na kung saan ay nanlaban umano sina Santiago at Garcia nang matunugan na pulis ang kanilang ka-transaksyon kaya’t sila ay napatay.
Nakuha sa crime scene ang 13 piraso ng plastic sachet ng hinihinalang shabu, isang caliber .45 pistol, isang caliber .38, isang P500 bill (buy-bust money), isang Honda TMX 125 Tricycle na may improvised plate number 033204 at isang motorsiklong Kawasaki Bajaj na walang plaka.
Dakong alas-6:20 ng gabi nitong Huwebes ay nagsagawa rin ng drug buy-bust operation sa Purok Mulawin 1, Barangay Bitas at dito naaresto ang lima.
- Latest