5 sakay ng trike todas sa road crash
MANILA, Philippines — Nasawi ang limang katao sa magkahiwalay na aksidente na kung saan ang isang tricycle ay nabangga ng bus habang ang isa ay nasalpok naman ng SUV sa lalawigan ng Laguna at Albay.
Sa Brgy. San Juan, Alaminos, Laguna ay nasawi ang mga biktimang sina Sherwin Bagumba, 37, driver ng tricycle at pasahero nitong si Sheryl Cabangal, 35, vendor, pawang residente ng Brgy. San Benito ng nasabing bayan matapos ang sinasakyan nilang tricycle ay nasalpok ng isang bus dakong alas-5:40 ng hapon sa kahabaan ng Maharlika Highway.
Nabatid na minamaneho ni Bagumba ang kanyang tricycle sakay si Bangal patungo sa direksyon ng Sto. Tomas, Batangas at pagsapit sa kahabaan ng highway ay nabangga ito ng LLI Bus (ARA 9780) na minamaneho ni Jolan Capule, 34, ng Brgy. San Diego, San Pablo City na papunta naman sa Alaminos, Laguna.
Sa lakas nang pagkakabangga ay nagtamo ng malulubhang sugat sa katawan ang dalawang biktima na idineklarang dead on arrival sa ospital.
Sa Brgy. Balangibang, Polangui, Albay ay namatay naman ang driver ng tricycle na si Ricardo Erguesa, 57, ng Brgy. Magurang at namatay habang nilalapatan ng lunas sa ospital ang mga pasaherong sina Victoria Bermido, 83; at Lorna Bermido Sanares, 54. Habang malubhang nasugatan si Venice Joy Bermido De Castro, 8 matapos na salpukin sila sa likuran nang sumusunod na Toyota Innova (XSJ-626) na minamaneho ni Nemesio Millena, 58, residente ng Brgy. Gabawan, Daraga sa kahabaan ng Maharlika National Highway sa nasabing lugar kamakalawa alas-5:40 ng hapon.
Sa lakas nang pagkakabangga ay sumalpok pa ang tricycle sa malaking puno ng acacia sa gilid ng kalsada dahilan para mabasag ang ulo ni Erguesa.
- Latest