‘Groupfie’ nasapol ng kidlat, 1 todas
MANILA, Philippines — Isang lalaki ang nasawi habang ang apat nitong kasama ang malubhang nasugatan matapos na tamaan sila ng kidlat habang nagu-”groupfie” picture sa isang isla sa bayan ng General Luna, Siargao Island, kamakalawa ng hapon.
Ang nasawi ay nakilalang si Lee Christian Ragosta Zamora, 30, manager ng isang insurance company, nakatira sa Taloto, Tagbilaran, Bohol.
Habang nasugatan ang mga kasamahan nitong sina Elain Jhane Ragosta Zamora, 19; Princes Figuracion Jayme, 23, taga-Banilad, Cebu; Zuzanne Sagamol, 27, ng Barangay Sun Valley, Parañaque City; at Grace Rodriguez Tolibas, 28, taga-Barangay 5, General Luna ng nasabing isla.
Sa ulat, pasado alas-2:00 ng hapon ay abala sa pagkuha ng litrato na grupo ang mga biktima nang biglang kumidlat na tumama sa buhanginan malapit sa kinatatayuan ng mga biktima sanhi para sila ay bumagsak.
Dinala ng mga pumpboat operators sa Siargao District Hospital sa bayan ng Dapa ang mga biktima ngunit idineklarang dead on arrival si Lee.
- Latest
