Pastor arestado sa shabu
MANILA, Philippines — Isang alagad ng isang religious group na nagkukunwaring maka-Diyos na isa naman palang kampon ng kadiliman ang nasakote ng mga otoridad at nakumpiskahan ng nasa P45,000 halaga ng droga sa isinagawang buy-bust operation kahapon ng madaling araw sa Cubao, lungsod ng Quezon.
Himas-rehas na ngayong ang pastor ng Peoples Network for Peace Committed Humble Servant na si Jimmy dela Torre, 49, may asawa, at nakatira sa Blk.1 Lot 13 Accesoria Homes, Brgy. San Juan, Cainta Rizal.
Ayon sa ulat, dakong alas-12:30 ng madaling araw nang dakipin si Dela Torre sa Aurora Blvd, Brgy. E. Rodriguez, sa lungsod, matapos makabili sa kanya ng shabu ang pulis na tumayong buyer.
Bago ito, isang buwang minamanmanan ng mga otoridad ang suspek dahil na rin sa salaysay ng mga drug user at pusher na nahuhuli sa bahagi ng Aurora Blvd., na ang pastor ang siya umanong supplier nila ng droga.
Ayon kay Cubao Police Station Drug Enforcement Unit Chief Police Capt. Ramon Acquiatan, noong una ay duda pa sila sa pagkakasangkot ng pastor sa kalakalan ng bawal na gamot ngunit noong magpositibo ito sa isinagawang operasyon ay doon na isinagawa ang pag-aresto.
Sa himpilan ng pusliya ay inamin ng suspek na noong una ay gumagamit lamang sila ng droga dahil umano sa impluwensiya ng mga kaibigan pero napilitan lamang umanong magbenta dahil kinapos at nagipit siya.
- Latest
