Kaso ng mga nagwaging ‘Narco-Pols’ tuloy-DILG
MANILA, Philippines — Hindi umano iaatras ng Department of Interior and Local Government (DILG) ang pagsasampa ng kaso laban sa mga tinaguriang narco-politicians na nagwagi nitong nakalipas na May 13 midterm elections.
Ayon kay DILG Secretary Eduardo Año, bagaman nirerespeto ng pamahalaan ang kagustuhan ng mga botante ay itutuloy nila ang mga kasong administratibo na isinampa laban sa mga narco-politicians.
Bagama’t ang ilan sa mga narco politician ay nagwagi sa halalan, tagumpay na rin para sa pamahalaan at sa bansa na ang iba sa kanila ay nabigo at hindi pinili ng mga botante.
Noong Marso, nagsampa ang DILG ng kasong administratibo tulad ng grave misconduct, conduct prejudicial to the best interest of the service, conduct unbecoming of a public officer, at gross neglect of duty sa Ombudsman laban sa 46 narco-politicians na pinangalanan ni Pangulong Rodrigo Duterte.
Tatlumputpito rito ang tumakbo, subalit 26 lang sa kanila ang nagwagi sa halalan at 26 sa kanila ang nagwagi sa kabila ng nasabing inilabas na listahan dalawang buwan bago ang halalan.
Sa nasabing mga nagwaging narco-pols ang dalawang congressmen, isang vice-governor, 18 mayors, tatlong vice-mayors, isang councilor at isang board member mula sa Calabarzon, BARMM, Eastern Visayas, Ilocos Region, Northern Mindanao, Western Visayas, Central Luzon, Zamboanga Peninsula, SOCCKSARGEN, at Caraga.
- Latest
