Magkapatid na paslit, patay sa taga ni nanay
MANILA, Philippines — Pinagtataga hanggang sa mapatay ang isang magkapatid na paslit na katutubong Mangyan ng kanilang sariling ina na pinaniniwalaang dumaranas ng diperensya sa pag-iisip sa Sitio Landing, Brgy. Pinagturiangan, Sta. Cruz, Occidental Mindoro nitong Biyernes.
Sanhi ng mga tinamong malalalim na taga sa katawan, dead-on-the-spot ang magkapatid na sina Rafin Juliata Cabudyok, 8-anyos at Butuan Juliata Cabudyok, 1 taong gulang.
Nahaharap naman sa kasong double counts of parricide ang suspek na si Dida Juliata Cabudyok, 30-anyos. Ang mag-iina ay pawang kasapi ng Ala-ngan, mula sa tribo ng mga katutubong Mangyan.
Sa ulat ng pulisya, naitala ang krimen sa Sitio Landing, Brgy. Pinagturiangan, Sta Cruz ng lalawigang ito pasado alas-7:00 ng umaga.
Ayon sa imbestigasyon, sa ‘di pa mabatid na dahilan ay bigla na lamang pinagtataga ng ina ang dalawa nitong paslit na anak gamit ang isang bagong hasang itak.
Sa pahayag ng mga kamag-anak, posible umanong nagka-diperensya sa pag-iisip ang ina ng mga bata kaya nagawa nitong paslangin ang mga anak.
Kasalukuyan na ngayong nasa kustodya ng Sta Cruz Police ang ginang na kalaboso na sa kinakaharap nitong kasong 2 counts of parricide na inihain sa Provincial Prosecutors Office sa Mamburao Occidental Mindoro.
- Latest