3 holdaper bulagta sa checkpoint
MANILA, Philippines — Bulagta ang tatlong sinasabing miyembro ng isang robbery/holdup group habang nakatakas naman ang isang kasamahan ng mga ito matapos makipagbarilan sa mga otoridad sa isang checkpoint sa bayan ng Malvar, Batangas, kahapon ng madaling araw.
Sa ulat ng pulisya, dakong alas-12:50 ng mada-ling araw nang mangyari ang bakbakan sa kahabaan ng JP Laurel highway sa Brgy. Luta Sur, Malvar.
Bago ito, nabatid na hinoldap ng apat na suspek na magkakaangkas sa dalawang motorsiklo ang isang kilalang gas station sa Brgy. Bugtong, Lipa City.
Matapos ang pangho-holdap sa gasolinahan ay tumakas ang mga suspek patungo sa JP Laurel higway sa bayan ng Malvar kung saan ay hinahabol na ang mga ito ng mga tauhan ng Lipa City Police at Malvar Police.
Dito ay isang checkpoint ang nakalatag sa JP Laurel highway kung saan imbes na tumigil ang mga suspek ay pinaputukan ng mga ito ang mga pulis na agad naman gumanti na nauwi sa shootout dahilan upang mapuruhan at tumimbuwang ang tatlo na kasalukuyan pang inaalam ang pagkakakilanlan habang nakatakas naman ang isang kasamahan.
Narekober sa pinangyarihan ng shootout ang isang Colt MK IV cal. 45 pistol, dalawang Remington cal. 45 pistol, isang kulay dilaw na Yamaha Mio at isang kulay itim na Honda TMX.
Patuloy naman ang pagtugis ng mga pulis sa nakatakas na kasamahan ng tatlo.
- Latest