4 karnaper patay sa shootout
MANILA, Philippines — Namatay noon din ang apat na lalaki na umano ay mga karnaper matapos makipagbarilan sa pinagsanib na puwersa ng Philippine National Police, Highway Patrol Group (PNP, HPG), Southern Police District (SPD) at Muntinlupa City Police kahapon ng umaga sa Muntinlupa City.
Walang nakuha na anumang pagkakakilanlan sa apat na suspek na pawang nagtamo ng mga tama ng bala sa iba’t ibang bahagi ng katawan.
Batay sa ulat, bago nangyari ang shootout dakong alas-5:25 ng umaga sa Don P. Reyes Avenue, Biazon Road, Southville 3, Brgy. Poblacion, Muntinlupa City ay naka-flash alarm sa mga tauhan ng HPG ang isang kulay itim na Hyundai Accent, na may conduction sticker MP 0669, na kinarnap umano ng hindi pa nakikilang mga suspek.
Kaagad nagkasa ng anti-criminality operation ang HPG, katuwang ang SPD at Muntinlupa City Police hanggang sa namataan ang naturang sasakyan sa kahabaan ng Don P. Reyes Avenue at pinara.
Sa halip na huminto ay bumaba ang tatlong sakay at pinaputukan ang mga pulis na masuwerteng walang tinamaan.
Gumanti ng putok ang mga otoridad at dito ay napatay ang apat na suspek.
Nang beripikahin ng mga pulis sa Land Transportation Office (LTO)ang conduction sticker ng nasabing sasakyan, nakarehistro ito sa Hyundai Eon.
Narekober sa crime scene ang isang umanoy bulto ng shabu, isang shotgun, isang pares ng unipormeng pang sundalo at PNP uniform at tatlong ID na nasa iba’t ibang pangalan.
- Latest