DepEd, pinaalalahanan ang magulang sa ‘Momo Challenge’
MANILA, Philippines — May paalala ang Department of Education (DepEd) sa mga magulang at mga guardian upang matiyak na ligtas ang kanilang mga anak laban sa kontrobersiyal na ‘Momo Challenge’ sa internet.
Ang Momo challenge ay nagtatampok sa nakakatakot na larawan ng isang babae na base sa isang sculpture sa isang museum sa Japan ay nagsimula sa isang messaging app.
Sa pamamagitan ng chat ay uutusan umano ang mga biktima, na kadalasan ay mga bata, na saktan ang sarili.
Kumalat na rin maging sa Youtube at sa iba pang social media platforms ang naturang Momo challenge at sinasabing naging dahilan na nang pagkamatay ng isang 11- anyos na batang lalaki kamakailan.
Ayon naman sa DepEd, ‘open communication’ pa rin sa pagitan ng magulang at mga anak ang pinakamabisang paraan upang labanan ang anumang panganib.
Paliwanag ng DepEd, dapat na panatilihin ng mga magulang at mga guardian ang bukas na pakikipagtalastasan sa kanilang mga anak upang matiyak na nababantayan ang mga ito laban sa anumang panganib na dulot ng internet, gaya ng Momo Challenge.
Iginiit ng DepEd na sa pamamagitan ng komunikasyon ay malalaman ng mga magulang ang mga ginagawa ng anak at magkakaroon ang mga bata ng lakas ng loob na magsabi ng kanilang saloobin sa mga magulang.
- Latest